Universitet haqida

Universitet haqida

QARSHI DAVLAT TEXNIKA UNIVERSITETI

O'zbekistonda yuqori texnika va muhandislik yo'nalishlari bo'yicha malakali mutaxassislar tayyorlash zarurati, Qashqadaryo viloyatidagi oliy ta'lim muassasalarini integratsiyalash orqali oliy ta'lim tizimini yangilash hamda hududlarda muhandis-texnika sohasi bo'yicha imkoniyatlarni kengaytirish maqsadida, O'zbekiston Respublikasi Prezidentining 2024-yil 10-dekabrdagi PQ–428-sonli qarori bilan Qarshi muhandislik-iqtisodiyot instituti, Qarshi irrigatsiya va agrotexnologiyalar instituti, Muhammad al-Xorazmiy nomidagi Toshkent axborot texnologiyalari universitetining Qarshi filiali hamda Toshkent kimyo-texnologiya institutining Shahrisabz filiali negizida QARSHI DAVLAT TEXNIKA UNIVERSITETI tashkil etilgan bo'lib, bu birlashuv o'z kasbiy salohiyatiga ega kuchli ilmiy-pedagogik bazani yaratdi.

7

Fakultetlar

81

Bakalavriat yo'nalishlari

66

Magistratura mutaxassisliklari

2024

Tashkil etilgan yil

Universitetda jami 7 ta yirik fakultet faoliyat yuritadi: Energetika muhandisligi, Transport va qurilish muhandisligi, Neft-gaz va geologiya, Irrigatsiya muhandisligi, Iqtisodiyot va boshqaruv, Raqamli texnologiyalar va sun'iy intellekt hamda Shahrisabz oziq-ovqat muhandisligi fakultetlari. Ushbu fakultetlar doirasida 81 ta bakalavriat ta'lim yo'nalishlari bo'yicha mutaxassislar tayyorlanadi. Shuningdek, universitetning magistratura bosqichida jami 66 ta mutaxassislik mavjud bo'lib, ular texnika, muhandislik, iqtisodiyot, oziq-ovqat sanoati, yer kadastri, geologiya va axborot texnologiyalari kabi ustuvor yo'nalishlarni qamrab oladi.

Fakultetlar:

• Energetika muhandisligi
• Transport va qurilish muhandisligi
• Neft-gaz va geologiya
• Irrigatsiya muhandisligi
• Iqtisodiyot va boshqaruv
• Raqamli texnologiyalar va sun'iy intellekt
• Shahrisabz oziq-ovqat muhandisligi

Ta'lim jarayoni zamonaviy laboratoriyalar, axborot-resurs markazlari, raqamli o'qitish platformalari va o'quv-amaliyot bazalari orqali tashkil etilgan. Universitetda nafaqat nazariy bilim, balki amaliy ko'nikmalarni shakllantirishga katta e'tibor qaratiladi. Bunda ishlab chiqarish korxonalari bilan hamkorlik, muhandislik yo'nalishlarida amaliy laboratoriya mashg'ulotlari, zamonaviy texnologiyalar asosida loyihalar ishlab chiqish tizimli yo'lga qo'yilgan.

Qarshi davlat texnika universitetining tashkil etilishi Qashqadaryo viloyati va janubiy mintaqalarda sanoat, energetika, qurilish, transport, irrigatsiya, neft-gaz va raqamli iqtisodiyotning jadal rivojlanishiga katta hissa qo'shadi. Yangi universitet hududda yuqori malakali muhandislar, konstruktorlar, texnologlar, IT mutaxassislar, iqtisodchilar va boshqa professional kadrlarni yetishtirishda tayanch ilmiy-ta'lim markaziga aylandi.

Qarshi davlat texnika universiteti o'zining fakultetlar tizimi, keng ko'lamli bakalavriat va magistratura yo'nalishlari, kuchli ilmiy salohiyatga ega pedagoglari, amaliyotga yo'naltirilgan ta'lim dasturlari va zamonaviy infratuzilmasi bilan nafaqat Qashqadaryo viloyati, balki butun O'zbekistonning texnikaviy va iqtisodiy rivojlanishida muhim o'rin egallaydi.